BAGUIO CITY – Nangrugin nga umawat ti La Trinidad, Benguet kadagiti turista nga agturong kadagiti nagduduma a pagpasyaran sadiay.
Iti panakiuman ti Bombo Radyo Baguio iti mayor ti ili, kinunana a nangrugi ita a lawas ti panagawatda kadagiti turista kagiddan ti panangipalubos ti Provincial InterAgency Task Force iti panaglukat ti turismo iti Benguet.
Sigun kenkuana, saan a maliklikan nga adda latta dagiti turista a nagtaud iti Baguio City nga agturong sadiay La Trinidad isut gapuna nga inawatda dagitoy.
Impasiguradona met a nainget a nasukimat dagiti dokumento dagiti nasao a turista kas iti negatibo a resulta ti RT-PCR test wenno saan ket ti kaadda ti vaccination card dagitoy.
Dinakamatna nga adda metten dagiti barangay officials ken tourism officers a nakabantay kadagiti pagpasyaran sadiay La Trinidad manipud naglukat ti turismo ti Baguio kadagiti turista manipud iti nagduduma a lugar.
Mamati met daytoy nga amin a turista nga agturong sadiay La Trinidad ket dimmalan iti umno nga proseso sakbay dagitoy a napalubusan nga umuneg iti Baguio.
Impannakkelna metlaeng a kaaduan kadagiti tourism workers ti La Trinidad ket fully vaccinated isut gapuna nga awan iti pagdanagan dagitoy.
Inyunay-unay pay ti mayor a ti panaglukat ti turismoda ket makatulong iti in-inot a panagrekober dagiti sektor a nakaru a naapektaran iti pnakasuspendir ti turismo gapu iti agdama a pandemya.
Iti agdama, kaaduan kadagiti pagpasyaran sadiay La Trinidad ket nakalukat para kadagiti umili ti probinsia ken kadagiti turista nga agtaud iti dadduma a lugar.
