QATAR- Nainget ti seguridad nga ipatpatungpal ti pagilian a Qatar para iti umadanin a FIFA World Cup 2022 ita a bulan.
Iti panakiuman ti Bombo Radyo, kinuna ni Bombo International Correspondent Christian Lobredo, madama ti preparasyon ti pagilian a Qatar para iti panagsangpet dagiti participantes ken bisita inton Nobyembre 15 agingga Nobyembre 17.
Sigun kenni Lobredo, nagdawat ti Qatar ti kanayunan a security forces manipud kadagiti kabangibang a pagilian tapno maipanamnama ti seguridad dagiti bisita.
Naidesignar met ti nagduduma nga housing ken training field dagiti players nga agtaud iti nagduduma a pagilian.
Nakasagana pay ti nagduduma a tourist spot ti Qatar kas ti resort ken dagiti nalalatak a lugar sadiay.
Kabayatanna, imbinglay ni Lobredo nga awanen ti masursurot a COVID-19 health protocols iti nasao a pagilian.
