Agtultuloy ti panangpapigsa iti lokal a gobierno iti siudad ti Baguio iti seguridad kadagiti pagadalan babaen iti panggep nga active shooter drills ken nainget a mental health interventions para kadagiti estudiante.
Sigun kenni Mayor Benjamin Magalong, tinalantanen iti Local School Board dagiti addang kasaruno dagiti napalabas nga insidente iti kinaranggas iti pagadalan, karaman ti insidente idiay Tacloban City.
Kinuna ni Mayor Magalong a manarimaan ti pannakaisayangkat kadagiti konsultasyon nu kasano a maipatungpal dagiti safety drills, bayat a makikikoordinar kadagiti nagannak, manursuro, ken mental health professionals tapno masolusyonan dagiti estudiante a posible nga addaan iti phsychological problem.
Impaganetgetna metlaeng a saan nga umdas ti kanayunan a presensia iti pulisia, ken napatpateg a nakapokus ti ramut iti agresibo a kagagalad iti agtutubo.
Kabayatanna, pinalagipan metlaeng ni Magalong nga adalen a nasayaat dagiti panawagan nga ibaba ti edad iti criminal responsibility, kagiddan iti panangilawlawagna a dagiti menor de edad ket dumaldalan iti umno a proseso iti kustodia, intervention, ken rehabilitation iti sidong dagiti agdama a linteg.
Impaganetgetna a rumbeng a nakabasar iti panagadal ken saan nga iti dagos a reaksion ti aniaman a panagbaliw iti polisia.
