Impeksa ti Benguet Provincial Agriculture Office nga adda iti nasayaat a kasasaad ti sektor ti agrikultura iti probinsya ti Benguet, iti baet dagiti karit a mapaspasaran dagiti mannalon.
Sigun kenni Delinia Juan, Provincial Agriculturist ti Benguet, nupay adda dagiti pakarigatan a nangruna iti epekto ti El Niño, agtultuloy latta dagiti mannalon iti panagmula kadagiti produktoda.
Manamnama a mapasaran iti probinsya ti panagkurang ti suplay ti danum gapu iti bassit a panagtudo, a mabalin a mangapektar iti panagdakkel ken panagdur-as dagiti mula.
Innayonna pay a nupay napasaran iti agarup dua a bulan a panagtutudo ti probinsya, nagtalinaed a nakasagana dagiti mannalon iti panangsalimetmet kadagiti talonda.
Kabayatanna, nagpalagip ni Juan kadagiti mannalon nga agtultuloy a mangipatungpal kadagiti addang iti panangsalimetmet iti danum, kas iti panagurnong iti danum tudo tunggal agtudo tapno adda aramatenda kadagiti mulada.
Dinakamatna met ti kinapateg ti panangmonitor kadagiti kondisyon ti talon ken dagiti mula tapno dagus a maaramid dagiti umiso a tignay no adda makitada a pannakadadael wenno panagkurang ti danum.
Impeksana ti kinapateg ti panagtitinulong dagiti mannalon ken suporta manipud iti gobyerno iti panangpatalinaed iti nasayaat a produksyon ti agrikultura iti probinsya. //via Bombo Khey Reparip
