BAGUIO CITY – Inladawan ti maysa a kailyan nga agnanaed ita sadiay Geneva, Switzerland a real wenno pudpudno ken strictest sense wenno kaingetan ti maim-implementar sadiay a total lockdown ken community quarantine gapu iti COVID-19.
Iti report iti Bombo Radyo ni Bombo International Correspondent Engr. Leandro Yangot Jr., kinunana a makita ti self-discipline dagiti agindeg sadiay Switzerland gapu iti panagtungpal dagitoy iti amin a naiyetnag a pagalagadan para iti community quarantine.
Kinunana a saanen a kasapulan dagiti pulis ken militar iti panakaipatungpal dagiti nasao a pagalagadan.
Inladawanna a naka-home quarantine amin a tattao sadiay Switzerland ken dagiti laeng pasdek a mangididiaya iti essential goods kas kadagiti drug stores ken supermarkets ken dagiti ospital ti nakalukat.
Innayon ti sigud a konsehal ti Baguio a rumrumwar laeng dagiti tattao sadiay Switzerland no apanda gumatang iti taraon ken agas ken no adda ti emergency kas iti panagturongda iti ospital.
Imbingayna pay nga awan ti panic buying sadiay ken awan ti panangited iti relief foods gapu iti umdas a suplay ti taraon sadiay.
Maob-obserbaran metlaeng kadagiti pagtagilakuan ti nasurok dua a metro a distansiya iti pila dagiti kustomer ken sakbay dagitoy a sumrek iti pagtagilakuan ket agbuggoda pay iti alkohol tapnu saan a makontamina dagiti produkto.
Innayon ni Yangot a nangilatang ti gobyerno ti Switzerland iti pondo kas tulong pinansiyal kadagiti agnanaed sadiay gapu iti panaka-apekto dagitoy iti COVID-19 pandemic.
Iti agdama, maikasiyam ti Switzerland iti sangalubongan kadagiti addaan kangatuan a kaso ti positibo a COVID-19 a dimmanon iti nasurok 16,000 ken pimmusay a dumanon iti 400.
