Naituding nga ipila ti Office of the Ombudsman ti plunder ken malversation case kontra kenni Sen. Jinggoy Estrada.
Sigun kenni Ombudsman Jesus Crispin Remulla, maipila ti kaso iti Sandiganbayan ita nga aldaw, Mayo 26, 2026.
Ti nasao a kaso kontra iti Senador ket mainaig iti maatap a naanomalyaan a multi-million peso flood control project.
Iti kanito a maipila, maikatlo ni Estrada a mammanday-linteg a maidarum mainaig iti flood control scandal, sarunuen da sigud a senador Bong Revilla ken ti sigud a mammanday-linteg a ni Zaldy Co.
Mailagip a naminsan a naibalud ni Estrada kalpasan a naidarum iti plunder gapu iti pork barrel scam.
Ni Estrada ti maikadua a senador a naabsuelto iti pork barrel scam, kalpasan ti pannakaabsuelto ni Revilla idi Hulio 2021.
Nupay kasta, naduktalan ti Sandiganbayan a guilty ni Sen. Estrada idi 2024 iti maysa a kaso ti bribery ken dua a kaso ti indirect bribery gapu iti maipagarup a panangibulsana iti P183 milion a kickbacks manipud kadagiti ghost projects a mastermind ni Janet Lim Napoles.
