Kinuwestionaran ni senator-judge Joel Villanueva nu kasano a nakailista ti agarup P150-Milyon a sales iti 2024 ti Cale88 Foods Corporation, maysa a banana chips exporter a maikonkonekta ita iti business interests ni Atty. Manases Carpio nga asawa ni VP Sara Duterte, iti baet nga awan ti naideklara daytoy nga empleyado iti General Information Sheet idi agdama a tawen.
Malaksid iti dayta, kinuwestionaranna pay dagiti dokumento a mangsupsuporta iti foreign transactions ti kompanya, pakairamanan ti sales invoices, shipping records, ken logistic costs.
Immunan a naiparang iti AMLC report a nakaawat ti nasao a kompanya iti pakabuklan a P319.2 Milyon inward remittances manipud China manipud 2022 agingga 2025.
Impetteng metlaeng ni Villanueva a kayatna a maamuwan nu adda ti umdas a trabahador, supplier, ken aktuwal a produksyon a mangsupsuporta iti naireport a sales ken foreign transaction ti kompanya.
Inlawlawagna a saan pay laeng a maibaga a fictitious ti operasyon daytoy ngem impettengna nga ‘alarming’ dagiti impormasyon a mailatlatag iti impeachment court seknan iti nasao a kompanya.
