Kiniddaw ni Senador Imee Marcos kenni President Ferdinand Marcos Jr. a temporario a suspindirin ti tallo nga opisial iti National Bureau of Investigation (NBI) seknan iti insidente iti pammaltog iti Senado idi kalman.
Iti surat, impaganetget ni Senador Imee ti seryoso a pakaseknan iti inawaganna nga “alleged siege and firing of shots by NBI” a nangitunda iti pannakaalarma iti publiko ken nanglukat kadagiti damag seknan iti seguridad iti Senado ken panagsungbat dagiti opisial a mangipapatungpal iti linteg.
Karaman kadagiti nairekomendar ti temporario a pannakaikat iti puesto da NBI Director Melvin Matibag, NBI-National Capital Region Chief Atty. Emeterio Dongallo Jr., ken NBI-Organized and Transnational Crime Division Chief Atty. Jerome Bomediano.
Sigun kenni Senador Imee, napateg ti nasao nga addang tapno mapagtalinaed ti integridad iti imbestigasion ken maliklikan ti aniaman a panagsuspetsa iti impluensia wenno iregularidad.
Immunan a natiliw ti maysa a drayber iti NBI seknan iti insidente kalpasan ti mapapati panagpaputok iti paltog iti uneg iti Senado iti GSIS compound iti alas-7:50 iti rabii.
Nupay kasta, impaganetget ni Matibag nga awan ti NBI agents a nakadeploy iti Senado idi oras iti insidente ken kinunana nga adda iti maysa a fellowship event dagiti opisialda iti maysa a hotel.
Ngem kinuna ni President Marcos nga agtaltalinaed a “claims” laeng dagitoy, ken impaganetgetna ti mapapati a saan a panagtunos dagiti statements.
Sigun kenkuana, ti agsinnabali a report ket ad-adda pay a mangpapigsa iti kasapulan a maisayangkat ti imbestigasion nga awanan iti aniaman nga impluwensia.
