Nangisubmitir ni Senador Imee Marcos idi laeng kalman iti Office of the Ombudsman ti chairman’s report ti Senate Committee on Foreign Relations maipapan iti pannakatiliw ni sigud a President Rodrigo Duterte ken pannakaiturongna idiay The Hague tapno maibalud ken sumango iti kaso mainaig iti pammapatay iti sidong ti war on drugs.
Iti suratna kenni Ombudsman Samuel Martires, kinuna ni committee chairperson Imee a ti imbestigasion ket nanglukat iti addang tapno posible a makasuan iti kriminal ken administratibo dagiti nangatao nga opisial ti gobierno bayat ti pannakatiliw ni Duterte idi Marso 11 tapno sanguen ti kasona iti International Criminal Court idiay Netherlands.
Ti pannakakemmeg ni Duterte ket maibasar iti arrest order nga impaulog ti ICC idiay The Hague.
Immunan a kiniddaw ti nasao a senador iti Ombudsman nga imbestigaran ni Justice Secretary Jesus Crispin “Boying” Remulla, Interior Secretary Juanito Victor “Jonvic” Remulla, PNP chief Police Gen. Rommel Marbil, CIDG chief Police Gen. Nicolas Torre III, ken Special Envoy for Transnational Crimes Markus Lacanilao para iti mapapati a panaglabsingda iti linteg bayat ti pannakatiliw ni sigud a president Duterte.
Sigun met kenni Boying Remulla, inaramiddda ti nasayaat para iti pagilian.
