Impeksa ni Senador Juan Miguel Zubiri ti panangkontrana iti singasing a gakat a comprehensive sexual education (CSE) iti Senado a mangikagkagumaan a manglapped iti panagsikog dagiti agtutubo.
Daytoy ket sumagmamano nga aldaw kalpasan nga inyebkas dagiti sumagmamano a grupo ti pakaseknanda seknan iti probision ti a comprehensive sexual education (CSE) ti Senate Bill 1979 wenno ti Adolescent Pregnancy Prevention Bill.
Kas kenni Senador Joel Villanueva, kontra metlaeng ni Zubiri iti maipagarup a panangisuro iti masturbation para kadagiti ubbing nga agtawen iti zero agingga iti uppat ti tawen, ken panangisuro iti “bodily pleasure” wenno “sexual rights” kadagiti ubbing nga agtawen iti innem agingga iti siam a nakabasar iti kurikulum nga inkeddeng ti UNESCO ken ti World Health Organization.
Ngem inlawlawag ni Zubiri a saan a kontra daytoy iti probision nga addaan panggep a mangipaay ti healthcare access kadagiti ubing nga ina.
Iti sidong ti Adolescent Pregnancy Prevention Bill, ti Comprehensive Sexuality Program ket agbalinto a “compulsary” a paset ti edukasion, iti amin a tukad nga addaan panggep nga agbalin a normal a matalantan ti maipapan iti seksualidad dagiti agtutubo ken “reproductive health”, ken tapno maikkat ti stigma iti amin a tukad iti pagadalan.
Immunan nga inlawlawag ni Senador Risa Hontiveros, sponsor ti SB 1979, nga awan ti probision ti addang maipapan iti panangisuro wenno panangparegta iti masturbation para kadagiti ubbing nga agtawen iti zero agingga iti uppat, ken panangisuro iti “bodily pleasure” wenno “sexual rights” kadagiti ubbing nga agtawen iti innem agingga iti siam.
