Indagadag ni Senador Pia Cayetano ti koordinasion dagiti ahensia ti gobierno kalpasan ti plano ti Office of the Solicitor General (OSG) a mangkanselar kadagiti birth certificate a sililimed a nagun-od dagiti ganggannaet ditoy Pilipinas.
Kas chairman ti Senate Blue Ribbon Committee, impaganetget ni Cayetano a kasapulan ti “proactive and sustained” a panagtitinnulong iti nagbaetan ti Philippine Statistics Authority, Bureau of Immigration, Department of Foreign Affairs, ken lokal a gobierno nangruna dagiti civil registries tapno maliklikan ti aniaman nga agpada nga aramid iti masakbayan.
Idi napalabas a tawen, inyuswat ti Senado ti imbestiogasion iti saan nga otorisado a panangipaulog ken panagaramat dagiti ganggannaet kadagiti dokumento ti gobierno agraman dagiti certificates of live birth, passports, ken tax identification numbers.
Sigun iti senador, ginundawayan dagiti ganggannaet pakairamanan dagiti indibidual a nainaig iti iligal a Philippine Offshore Gaming Operators (POGOs), ti registration system ti Pilipinas.
Kinuna ti senador a ti isyu ket mabalin a mangpataud kadagiti peggad iti seguridad ti pagilian.
Maipalagip nga itay laeng kallabaes, impablaak ni Solicitor General Menardo Guevarra a panggepna nga “invalidate” dagiti birth certificates a nagun-od dagiti “foreign nationals” wenno gangannaet.
