Kinuna ni Senator Raffy Tulfo nga inungtanna ti anakna a ni Quezon City 2nd District Representative Ralph Wendel Tulfo gapu ta naglabsing iti linteg trapiko nu sadino natiliw daytoy ken ti convoyna idiay EDSA Busway idi Enero 23.
Sigun iti senador, nagkiddaw ti anakna iti pammakawan kenkuana ken binagaanna ti anakna nga agkiddaw met iti pammakawan iti publiko.
Inlawlawag ni Tulfo nga agdardaras ti anakna ken ti driverna ti nangiserrek iti SUV iti bus stop.
Innayon ti senador nga inaklon ti anakna a nagbasol daytoy ken nagkiddaw iti pammakawan.
Gapu iti daytoy, impetteng ni Tulfo nga awan ti makitkitana a problema iti napasamak gapu ta sigun kenkuana, ti napateg ket saan a naglibas ti anakna ken saan a nagusar iti plaka nga otso a mangipakpakita a saan daytoy nga abusado.
Maipalagip nga itay nabiit ket inwaragawag ti Department of Transportation’s Special Action ken ti Intelligence Committee for Transportation (SAICT) nga adda ti natiliwda a convoy ti mammanday-linteg gapu iti saan nga otorisado a panang-usarda iti EDSA Busway idi Enero 23.
Maibasar iti protocol, dagiti motorista a matiliwan nga agaramat iti EDSA Busway uray saanda nga otorisado ket agbayad iti multa.
Iti First Offense, P5,000; iti Second Offense, P10-K, maysa a bulan a suspension ti lisensiya ken mandatory road safety seminar; iti Third Offense, P20-K, ken maysa a tawen a suspension ti lisensiya ken iti Fourth Offense, P30,000 ken rekomendasyon a pannaka-revoke ti lisensiya.
