Nangipila da Senador Robinhood Padilla ken Senador Juan Miguel Zubiri iti resolusion nga addaan panggep a mangimbestigar ti kasasaad ti amnesty proclamation ni President Ferdinand “Bongbong” Marcos Jr.
Maibasar iti Senate Resolution No. 1258 nga impila ni Padilla ken Zubiri, nakalanad ti kinaawan ti sigurado ti sangsangguen dagiti agsusublik iti gobierno a rebelde nga agur-uray iti pannakaaprobar dagiti aplikasionda ti amnestia.
Maipalagip nga idi Nobiembre idi napalabas a tawen, impaayan ni President Marcos Jr ti amnestia dagiti sumagmamano a grupo dagiti rebelde babaen ti Proclamation Nos. 403, 404, 405 at 406 kas paset ti inisiatibo ti agdama nga administrasion.
Karaman dagiti grupo ti Rebolusyonaryong Partido ng Manggagawa ng Pilipinas/Revolutionary Proletarian Army/Alex Boncayao Brigade (RPMP-RPA-ABB), Communist Party of the Philippines-New Peoples Army-National Democratic Front (CPP-NPA-NDF), Moro Islamic Liberation Front (MILF), ken Moro National Liberation Front (MNLF).
Naipaay ti amnestia tapno paregtaen dagiti rebelde nga agsubli iti gobierno.
Panggep ti resolusion ti Senado a kitaen dagiti makagapu iti pannakataktak ti pannakaited ti amnestia.
Ngem saan a saklawen ti amnestia iti sidong dagiti baro a proklamasion dagiti basol a kidnap for ransom, masaker, panangrames, terorismo, krimen a naaramid kontra iti “chastity”, ken illegal a droga.
Ti dadduma pay a nailaksid ket dagiti nakaro a panaglabsing iti Geneva Convention idi 1949, genocide, krimen kontra kadagiti tattao, war crimes, torture, enforced disappearances, ken dadduma pay a panaglabsing.
Kagiddan dagiti proklamasion, nangipaulog pay ni Marcos iti Executive Order No. 47 a mangbalbaliw iti EO No. 125, series of 2021, a nangbukel iti National Amnesty Commission (NAC).
