Kinuwestionarran ti minority bloc ti patienda a ‘rushed’ a proseso ti panangamyendar kadagiti Senate rules.
Iti joint statement ti minority nga inpablaak ni Senator Kiko Pangilinan idi kalman, binabalawda iti napartak a major change iti senate rules nangnangruna ta adda pay dagiti miyembro ti minority a kayatna nga agsao ket mangiyebkas kadagiti damagda.
Kasaruno daytoy iti panagwalkout da iti katengaan ti nabara a diskusyon seknan iti pannakaamyendar ti Senate rules a mangpalubos iti maysa a senador a makipaset iti sesyon ti senado babaen iti online wenno remote participation.
“We walked out because what happened on the floor looked less like orderly deliberation. The proposed rule change affects how senators may attend sessions, participate in proceedings and exercise their mandate through remote means, and such a measure should be opened to healthy public debate instead of being rushed by the tyranny of the majority,” sigun iti statement dagitoy.
Ti mosyon ket inpila ni Senator Rodante Marcoleta idi Mayo 11 no sadino panggepna a palubosan ti “justifiable” a remote attendance dagiti miyembro ti senado.
Sigun met iti minority, agdardaras unay dagitoy iti proseso ti pannakaamyendar dagiti pagalagadan ti senador ken saan a naikan dagiti dadduma a senador ti umdas nga oras tapno iyebkasda ti kapanpanunotanda.
Mabasa pay iti statement ti minority ti panangkwestionarda iti nasao a rule change no sadino dinakamatda a nalabit ti mosyon ket tapno makabotos ni Senator Bato Dela Rosa.
Gapu iti panag-walkout dagitoy, napaay ti plenaryo a makabukel iti quorum isu’t gapuna a saan a nasurot ti singasing.
Kalpasanna, na-adjourn ti sesyon ken naituding a maituloy manen inton Hunyo 1. //bombokaren.c.sapirao
