Saan pay latta a dimmar-ay ni Senator Ronald “Bato” dela Rosa iti Senate plenary session ti Senado idi kalman.
Sigun kenni Senate President Vicente “Tito” Sotto III, awan pay ti naawatda nga impormasyon maipapan kenni Senator Bato.
Maipalagip a ti kaudian a panangipablaak ni Senator Bato iti mensahena ket idi rinambakanna ti maika-64 a panagkasangayna di January 21 nu sadino, kagiddan ti panagyamanna kadagiti mangsupsuporta kenkuana ket ti panangipatalgedna nga “alive and well” daytoy.
Impettengna metlaeng a saanna nga itulok a gangganaet a korte ti mangtingiting iti kasona nu di ket korte iti Pilipinas ken iti sangwanan dagiti kakailyanna a Pilipino.
Kagiddan dayta, agtaltalinaed ti panangidepensana nga addaan daytoy iti dignidad ken patriotism.
Nangrugi a saan a nagpakpakita ni Senator dela Rosa kadagiti plenary session kalpasan a nadakamat ti maatap a panangipaiyulog iti international tribunal iti warrant of arrest kontra kenni kenkuana.
Nupay kasta,saan pay a nakumpirmar nu pudno a nangipaiyulogen ti ICC iti warrant of arrest kontra iti nasao a senador.
