Pinaglibakan ni sigud a police officer, Senator Bong Go ti mapapati a “reward system” iti war on drugs bayat ti administrasion ni sigud a president Rodrigo Duterte.
Impaganeget ni Go nga awan ti “reward system” a naipatungpal kasukat ti biag ti asinoman agsipudta, kanayon a raraemen ni Duterte ti rule of law.
Kasaruno daytoy iti aligasion ni retired police colonel Royina Garma kabayatan ti panagdenggeg iti Senate quad committee a kiniddaw ni Duterte kenkuana nga agsapul iti opisial a mangipatungpal iti Davao model of the war on drugs, nu sadino magunggonaan dagitoy iti P1 milion kalpasan iti panangpapatayna kadagiti drug suspects.
Nupa kasta, binabalaw ni Go ti aligasion ni Garma ken kinuna na paset laeng daytoy iti taktika ni Garma tapno saan a maduktalan ti kinapudno.
Kabayatanna, inyunay-unay ni Go nga awan ti pannakipasetna kadagiti operational requirements iti war on drugs iti napalabas nga administrasion.
