Inakusaran ni Senator Imee Marcos ti mannarimaan nga administrasyon iti maatap a pannakibang daytoy iti senado kalpasan a nagkomento ni President Ferdinand Marcos, Jr. seknan iti kontrobersyal a mosyon nga online voting para kadagiti senador.
Iti mensahe daytoy iti maysa a messaging platform idi kalman, dinakamatna nga ‘very obvious’ ti araramiden ti mannarimaan nga administrasyon kontra iti majority bloc ti senado.
“Even the President is now lambasting the Senate and meddling with the online voting issue,” sigun kenni Senador Marcos.
Sakbay iti dayta, kinontra ni President Ferdinand Marcos, Jr. ti mosyon nga amyendaran dagiti rules ti senado tapno mapalubosan ti online voting.
Sigun kenkuana, kasla araramaten laeng ti majority bloc ti nasao a mosyon tapno mapalubosan a makabutos ni Senator Ronald “Bato” Delarosa iti katengngaan ti panangsarak kenkuana dagiti otoridad.
Innayon pay daytoy a para laeng kenni Senator Bato ti nasao a singasing.
Para met kenni Senator Imee Marcos, ti panagdamat a daytoy ni President Marcos, Jr. a kabsatna ket mangipakita laeng iti nalawag a pananglabsing iti boundaries iti nagbaetan ni ehekutibo ken lehislatura.
Iti agdama, awan pay laeng ti komento ti Malacañang seknan iti dikamat ti presidential sister. //bombokaren.c.sapirao
