Nainget a kinontra ti grupo nga August Twenty One Movement (ATOM) ti statement ni President Ferdinand Marcos Jr. a saan nga ‘ill-gotten’ wenno natakaw ti kinabaknang ti pamilya daytoy.
Ti grupo nga ATOM ket nabukel kalpasan a napapatay ni sigud a senador Benigno Aquino Jr idi 1983 ken nabigbig metlaeng ti nasao a grupo gapu iti papel daytoy idi 1986 People Power Revolution a nangpaikat kenni sigud a President Ferdinand Marcos Sr.
Iti statement ti nasao a grupo, inawaganda ti nasao nga statement ti presidente kas ulbod.
Maipalagip nga idi Agosto 14 ti agdama a tawen, nainget a dinepensaan ni President Marcos, Jr ti panangibilang iti kinabaknang dagitoy kas ill-gotten wealth.
Inlawlawag ti presidente a saan a nagtaud iti takaw ti kinabaknang ti pamilya daytoy.
Kabayatanna, impaima metten ni President Marcos, Jr ti issue seknan iti maatap a saan a nabayadan a binil-bilyon nga estate tax kadagiti abogado daytoy. //kcs//
