Impakaammo ni Senate President Alan Peter Cayetano ti panagbukkel ti Blue Ribbon Subcommittee a mangtutok iti imbestigasyon iti maatap a multi-billion peso flood control scandal iti pagilian.
Idauloan ni Senator Rodante Marcoleta ti nasao a sub-committee kagiddan iti mapaspasamak a reorganization ti Blue Ribbon Committe.
Napasamak ti nasao nga addang iti tengnga ti kontrobersya kalpasan nga inrekomenda ti Department of Justice (DOJ) ti plunder ken graft kontra kenni Senator Jinggoy Estrada ken sigud a Deparment of Public Works and Highways Secretary Manuel Bonoan seknan dagiti iregularidad iti flood control projects.
Binabalaw met ti sumagmamano a political analysts ti baro a komposisyon ti Blue Ribbon Committee gapu ta posible a kumapoy ti kredibilidad dagiti imbestigasyon.
Nupay kasta, impetteng ni Senate President Cayetano a panggep ti nasao a subcommittee nga adadda a mapapartak ti panangibutaktak ti kinapudno seknan dagiti alegasyon a korapsyon.//bombokaren.c.sapirao
