Idagdagadag ni Senator Risa Hontiveros ita nga aldaw iti baro a dadaulo ti Senado nga agtignay a maipasa iti Sexual Orientation, Gender Identity or Expression, wenno Sex Characteristics (SOGIESC) bill nga agtaltalinaed a nakasagana iti maikadua a pannakabasa iti Upper Chamber.
Impaulog ti nasao a senador ti kiddawna iti baet ti kinuna ti United Nations Population Fund (UNFPA) idiay Manila a kiddawda iti Kongreso a mangipasa ti linteg kontra iti diskriminasion kontra kadagiti miembro iti komunidad.
Sigun kenni Senador Hontiveros, kiddawna nga itakder ti Majority Leader ti LGBTQIA+ community ita a panawen iti Pride Month ken ti inaldaw a panagbiag dagitoy.
Ngem nupay kasta, impeksa ni Senate President Francis “Chiz” Escudero babaen iti text message nga ad-adda a dakkel ti tsansa ti maisingsingasing nga Anti-Discrimination Act ngem ti Sexual Orientation, Gender Identity or Expression, wenno Sex Characteristics wenno SOGIESC bill.
Idi Mayo 8, nangisayangkat ti komite iti Senado iti social justice, welfare, and rural development nga indauloan ni Senator Imee Marcos, iti hearing iti sumagmamano a komprehensibo a gakat kontra diskriminasion nga insingasing ti sumagmamano a senador a kasukat ti SOGIESC Bill.
Maipalagip a ti SOGIESC Bill nga indauloan ni Senador Risa Hontiveros nga iggemna ti committee on women, children, family relations, and gender equality ket naiturong iti Committee on Rules para iti kanayunan a panagadal kalpasan a nakaawat ti ibubusor manipod iti sumagmamano a narelihiosuhan a grupo ken nadumaduma a sektor.
