Impakaammo ni Department of the Interior and Local Government (DILG) Secretary Jonvic Remulla a posible nga agtalinaed iti Philippine National Police (PNP) General Hospital ni Senator Rodante Marcoleta tapno adadda a mataming daytoy.
Kalpasan gamin a maarestar daytoy itay agsapa, naipasidung daytoy iti medical examinations kas paset iti proseso.
Impakaammo metlaeng ni Philippine National Police- Criminal Investigation and Detection Group Dir. Major General Robert Alexander Morico II nga inreklamo ni Senator Rodante Marcoleta ti panagsakit ti barukongna.
Innayonna pay a nangato metlaeng ti ‘blood pressure’ ti nasao a senador.
Sigun kenni Remulla, posible nga agtalianed daytoy iti ospital iti dua agingga tallo nga adlaw.
Apaman a makumpleto ti panangtamingda iti salun-at ti senador, maiyakar daytoy idiay Quezon City Jail idiay Payatas.
Maipalagip a naarestar ni Marcoleta kasaruno iti boluntaryo a panagsurrenderna kadagiti otoridad itay agsapa gapu iti maatap a pakainaiganna iti P75 milyong campaign donations a saan a naideklara iti Statement of Assets, Liabilities, and Net Worth (SALN) ken Statement of Contributions and Expenditures (SOCE) daytoy. //bombokaren.c.sapirao
