Pinaglibakan ni Senator Ronald “Bato” Dela Rosa ti kinuna ni Justice Secretary Jesus Crispin “Boying” Remulla nga awan ti police reports kadagiti pimmusay iti drug war.
Sigun kenni Senator Dela Rosa, saan a matmaturog laeng dagiti pulis tapno saanda nga irecord dagiti pimmusay.
Nupay kasta, kinuna ni Remulla a naikonsulta iti forensic pathologist a ni Dr. Raquel Fortun dagiti maipapan iti nasao a banag ken natakuatan nga adda ti saan a panagtutunos ti death certificates dagiti biktima.
Maibasar iti death certificate dagiti dadduma a biktima, cardiac arrest ti makagapu iti ipupusay dagitoy ngem iti autopsy, adda dagiti tama ti paltog iti ulo dagitoy.
Impetteng pay ni Remulla a 95% kadagiti biktima iti drug war ket awan iti listaan.
Kabayatanna, inlawlawag met ni Dela Rosa a kas hepe ti PNP idi napalabas nga administrasion, siniguradona nga adda ti dokumento ti pulisya a mabalin a mausar a depensada no maimbestigaran ti drug war.
