BAGUIO CITY–Pinaneknekan ti maysa a 72-anyos nga ama a pudpudno ti pannarita a saan a lapped ti edad wenno tawen no edukasion ti pagsasaritaan.
Daytoy ket kalpasan a balligi a nagturpos ni Arsenio Malong, agtawen iti 72-anyos, taga Atok Trail, Baguio City iti kurso a BS in Agriculture major in Animal Science sadiay Benguet State University.
Kinunana nga idi pay napalabas a tawen a nalpasna ti nasao a kurso ngem idi laeng kalman a nagmartsa gapu ta inurayda ti dadduma nga estudiante a nagturpos gapu ta bassit laeng ti bilang dagitoy.
Inaklonna a kabayatan ti panagadalna ket adda dagiti panawen nga arigna maudi daytoy kas leksion.
Nupay kasta, impanakkelna a kabayatan dagiti aktual a presentasion ket saan met daytoy nga agpaudi nangruna ta adun dagiti nagbalin a kapadasanna iti panagtaraken iti nagduduma a dingwen.
Inyestoria ni Malong a nabaelanna ti nagadal iti baet ti edad daytoy babaen iti tulong ti pamiliana kasta metten ti bukodna nga urnong babaen iti panagtarakenna iti baboy ken manok.
Kinunana nga awan ti pilpilien ti edukasion la ketdi ti maysa a tao ket addaan iti gaget, regget ket deteminasion.
Kanayunan nga istorya,
Imbinglay ti maysa a 72-anyos nga ama dagiti napaliiwna a parikot iti sektor ti agrikultura ditoy lokalidad.
Sigun ken ni Arsenio Malong, maysa a graduate ti BS in Agriculture, major in Animal Science, agtaltalinaed ti sumagmamano a parikot a mapaspasaran iti sektor ti agrikultura.
Iti interview ti Bombo Radyo Baguio ken ni Malong, kinunana a napailiwna a manmano laeng dagiti indibidual nga interesado iti agrikultura. Kinunana nga adu dagiti agturturpos iti kurso mainaig iti agrikultura ngem kaaduan kadagitoy ket nagturong iti ballasiw taaw wenno saan ket agserserbi kadagiti pribado a kampania.
Gapu iti daytoy, kinuna ni Malong a manmano dagiti mangtutok iti agrikultura tapno mapadur-as daytoy.
Impanamnama ni Malong a kalpasan ti panagturposna ket tumulong daytoy kadagiti mannalon ditoy lokalidad para iti pannakapasayaat ti sektor ti agrikultura.
Ni Malong nga agtawen iti 72 ket nagturpos idi laeng kalman iti nasao a kurso.
Nagserbi daytoy kas secretary ken kapitan ti barangay iti las-ud ti adu a tawen ken sigud pay daytoy a kameng ti Philippine Army.
