Pinatganen iti Baguio City Council ti “exemption” wenno pannakailaksid iti senior citizens manipod iti (Baguio, La Trinidad, Itogon, Sablan, Tuba, at Tublay) iti number coding scheme nu agbiahe para iti medical appointments ken trabaho.
Iti sidong iti City Ordinance No. 94 (2025) nga insurat ni Councilor Jose Molintas, mabalin nga agbiahe dagiti senior manipod alas-9 ti agsapa agingga alas-3 ti malem, oras a saan a makaapektar iti gunay iti trapiko sigun iti panagadal iti traffic enforcement unit.
Panggep iti ordinansa nga ad-adda a mapalaka ti panagturong dagiti natataengan iti central business district iti Baguio para iti napateg a pagturongan.
Immuna a vineto daytoy ni Mayor Benjamin Magalong tapno mangisayangkat iti kanayunan a panagadal ken sungbatan ti isyu iti posible a diskriminasion kadagiti kaaruba a lugar. Kalpasan ti nasao a banag, naaprobran metlaeng kalpasan a nairaman dagiti lugar iti BLISTT ken suroten dagiti rekomendasion.
Nakikoordinar metlaeng ti siudad iti pulisia tapno maipasigurado ti kinatalged, nangruna iti emerhensia.
Nabilin metlaeng dagiti otoridad a saan nga ipatungpal ti number coding nu adda ti dagos a kasapulan iti medikal.
Kabayatanna, inlawlawag ni Molintas a saan a nairaman iti persons with disabilities (PWDs) gapu iti kumplikado a classification dagitoy, ngem mabalin met dagitoy a maipaayan iti exemption a nakadepende iti kasasaad.
