BAGUIO CITY – Mailaksiden manipud iti panagbayad ti garbage fee dagiti senior citizens ken dagiti persons with disabilities (PWDs) ditoy siudad ti Baguio.
Kasaruno daytoy ti panaka-aprobar ti ordinansa iti lokal a konseho ti siudad a nangipaay iti nasao a panakailaksid iti panagbayad ti garbage fee kadagiti kwalipikado a senior citizen wenno PWD.
Nupay kasta, nailanad iti ordinansa a nasken nga iparang dagiti kwalipikado a benipisaryo ti ID dagitoy sakbayda a makapagnumar iti nasao a pribelihio.
Nailanad pay iti nasao nga ordinansa nga ituloy ti lokal a gobyerno ti Baguio a mangsuportar ken mangitandudo kadagiti programa ken proyekto para kadagiti senior citizens ken kadagiti PWDs.
Naamuan a kasapulan nga agbayad ti garbage fee sakbay a makaala ti barangay clearance, barangay certificate, business permit ken dadduma a serbisyo.
Paglintegan metlaeng ti siudad ti panakakolektar ti garbage fee manipud iti amin a pagtaengan ditoy Baguio.
Ag-epekto ti nasao nga ordinansa iti kanito a pirmaan daytoy ti mayor ken maipablaak.
