Napalawa agingga sadiay Mountain province ken Ifugao ti serbisyo ti Benguet Agri-Pinoy Trading Center.
Sigun kenni Engr. Roger Navarro, Under Secretary for Operations, Agri Fisheries Mechanization ti Department of Agriculture (DA), saan laeng a ti probinsiya ti Benguet ti maak-akomodar agsipudta karaman metlaeng dagiti dadduma a probinsiya.
Gapu iti dayta, panggep ni Department of Agriculture Secretary Francisco Tiu Laurel Jr. a mapalawa ti processing plant wenno center para iti daytoy.
Malaksid ti dayta, punteria ti nasao nga opisial a mapalawa ti processing plant wenno center ti BAPTC tapnu amin a traders ket agturungda sadiay.
Iti mensahe ti opisial, nailawlawag nga ad-adda a kasapulan a masolusyonan ti post harvest nangnangruna ti high value crops ken livestocks.
Daytoy ti agdama a padpadasen ken ad-adalen ti nasao nga ahensya a maipaayan iti solusyon.
Kabayatanna, kinuna ni Ruth Diego, Director ti Agri-based technology Business Incubator/Innovation Center (BAPTC) a napintas daytoy nga ediya tapnu adda ti pakaiturongan dagiti nateng no nababa ti presyo ken no mapasaran ti oversuply.//Bombo Noveh Organo
