Temporario a maiserra kadagiti lugan ti Session Road ken paset iti Calderon Street iti siudad ti Baguio manipod Agosto 29 agingga Setiembre 1 kas paset iti panangrambak iti maika-11 a Charter Day iti siudad.
Iti sidong iti Executive Order No. 96, a pinirmaan ni Mayor Benjamin Magalong, maiserra ti Session Road manipod alas-10 iti rabii agingga iti tengnga iti rabii iti Agosto 29 para iti panangiserrek kadagiti kagawaan ken booth iti Baguio Country Fair ken Baguio Day Melting Pot of Culture.
Manipod Agosto 30 agingga Setyembre 1, agtuloy met a maiserra ti kalsada para kadagiti naituding nga aktibidad.
Saklaw iti road closure ti dua a nagsinnumbangir a linia iti Session Road, Assumption Road, ken paset iti Calderon Street manipod iti Gamaphel Building agingga iti Prime Hotel.
Imbilin metten iti mayor ti City Tourism, Culture and Arts Office, Baguio City Police Office, City Engineering Office, Public Information Office, ken dadduma pay a maseknan nga opisina a siguraduen ti nasayaat a panangipatungpal iti programa.
Panggep iti maika-11 a Charter Day, nga addaan iti tema a “Cultivating Circularity: Building an Everlasting Baguio,” a rambakan ti pakaistoryaan, kultura, ken panagkaykaysa dagiti residente bayat a maitaltal-o ti maysa a natibker, ken progresibo a masakbayan para iti siudad.
