Ikagkagumaan ti Shilan Tour Guides Association iti Barangay Shilan,La Trinidad, Benguet nga ipatungpal dagiti nagduduma nga inobasyonda sadiay Shilan Tourism Village tapno makapaset manen dagitoy iti Best Tourism Village 2025.
Sigun kenni Dario Montes Sr., maysa kadagiti founder iti Shilan Tour Guides Association iti Shilan Tourism Village,karaman iti proposed projects dagitoy ti pannakaimuntar dagiti trash bins, safety gears, ken pannakaibagon iti opisina ti Shilan Tour Guides Association.
Imbinglay ni Montes a dakkel ti tulong ti cash incentive a napangabakan dagitoy ken babaen metlaeng daytoy ket maguyguyugoy metten dagiti sumagmamano a babbarangay iti nasao a munsipyo a mangbukel wenno mangpasayaat met kadagiti tourism villages dagitoy.
Innayon ti opisyal a babaen iti Shilan Tourism Village ket maipakita metlaeng dagiti nagduduma a produkto dagiti bumarangay sadiay Shilan.
Karaman kadagiti mabalin a maimatangan sadiay Shilan Tourism Village ti nagduduma a natural sites kas iti rivers, waterfalls, caves, ken dagiti eagle sanctuary.
Mainaig iti dayta,kinuna met ni La Trinidad Councilor Belmer Elis a makitkitada kas maysa a karit ti pannakauram ti Patawid Gyarari Gallery-maysa kadagiti tourist attractions iti nasao a barangay.
Nupay kasta,kinuna ti opisyal nga ikagkagumaan dagiti bumarangay sadiay Shilan nga agtitinulong para iti naan-anay a panakapasayaat iti Shilan Tourism Village.//Bombo Genzel Depayso
