Impakaammo ti Commission on Elections (Comelec) a naituding a mangipaulog dagitoy iti show-cause order (SCO) iti presidente ti Centerways Construction and Development Inc. ita nga aldaw gapu iti panangidonarda iti P30 million bayat ti 2022 senatorial campaign ni Senator Francis “Chiz” Escudero.
Sigun kenni Comelec chairperson George Erwin Garcia imbilin ti poll body nga ilawlawag ni Lawrence Lubiano ti campaign donation ken idepensa no apay a saan a rumbeng a makasuan daytoy iti panaglabsingna iti Section 95 iti Omnibus Election Code (OEC).
Daytoy ket kalpasan nga inaklonna a nangidonar daytoy iti nasao a gatad kenni sigud a Senate President Escudero.
Kinunana a ti indonar daytoy ket nagtaud mismo iti bukodna a bulsa.
Kagiddan dayta, immunan metlaeng nga inaklon ni Escudero nga aggayyem dagitoy kenni Lubiano ken daytoy ti maysa kadagiti campaign contributors bayat ti senatorial campaign idi 2022
Nupay kasta, pinaglibakanna a saan a nakibiang iti negosyo ken iti contrata daytoy iti gobierno.
