BAGUIO CITY – Maisaysayangkat ti signature campaign ditoy lokalidad kontra iti implementasyon ti Tax Reform For Accelaration and Inclusion (TRAIN) Law.
Sigun kenni Christian Dave, panakangiwat ti ANAKBAYAN-Metro Baguio, tarigagayda a makaur-or ti pirma manipud kadagiti mangtubtubngar iti implementasion ti TRAIN Law.
Kinunana a narugian idi kanikadua ti nasao a signature campaign sadiay merkado publiko ti siudad ti Baguio.
Dinakamatna nga adun dagiti nagpirma iti petisyon ti grupoda a pakairamanan dagiti konsumer ken dagiti agilaklako iti merkado publiko.
Innayonna a kagiddan ti signature campaign ket nangipatungpal met laeng ti grupoda iti programa iti merkado publiko kas wagas ti panangrambakda iti 120th Independence Day.
Impetteng pay ni Christian Dave a nasken a mabaliwan ti dadduma a probision ti TRAIN Law tapno saan unay a madagsenan dagiti umili nangruna dagiti ordinaryo a tattao.
