Kiniddaw ni sigud a Bamban, Tarlac Mayor Alice Guo ita nga aldaw iti Department of Justice (DOJ) a madismisar ti reklamo a notarized counter-affidavit nga immun-una nga inpilana para iti sabali a reklamo.
Sigun iti abogado ti sigud a mayor a ni Atty. Stephen David, nakipagsaritada iti nasao nga ahensia a ni Guo ket rumbeng a saan a makasuan gaputa saan a nakipaset daytoy iti notarization.
Immunan a kinuna ti secretary ni Guo a ni Cath Salazar kadagiti senador a ni Guo ket mapapati a nabilin nga agpatulong iti pannakanotario ti dokumento daytoy.
Nupay kasta, patien ni Atty. David a saan a kayat a sawen a “liable” ni Guo iti nasao a banag.
Naipila iti Department of Justice ti counter-affidavit ni Guo para iti reklamo daytoy a qualified trafficking sumagmamano nga aldaw kalpasan a naisubmitir ti reklamo para iti “resolusion” idi Agosto 6.
Nanotarioan daytoy idi Agosto 14 idiay San Jose Del Monte City, Bulacan, idi addan ni Guo iti ruar ti pagilian.
Immunan a pinaneknekan ni Guo a pinirmaanna ti counter-affidavit daytoy sakbay a pimmanaw iti pagilian iti umuna a lawas ti Hulio.
Kabayatanna, ni Atty. Elmer Galicia, ti abogado a nagnotario ti counter affidavit, inaklonna a ni Guo ket saan a personal a nagsapata iti sanguananna, a kalikaguman ti linteg.
Gapu iti dayta, nangipila iti National Bureau of Investigation ti reklamo kontra kenni Guo a kas ti “perjury,” panagaramat ti “falsified document,” ken “falsification by a notary public” iti Department of Justice.
Ni Galicia ken dagiti dadduma pay ket sumangsango iti reklamo a “falsification by a notary public,” “perjury,” ken “obstruction of justice.”
