Impakita ni Davao Oriental Rep. Cheeno Miguel Almario ti maysa a documentary kabayatan ti House QuadComm inquiry maipapan ti interview ni She Zhijiang, maysa a Chinese citizen a mangipakpakaamo a ni sigud a Bamban, Tarlac Mayor Alice Guo ket spy ti pagilian a China.
Sigun kenni She Zhijiang, pagdandanaganna ti biyag ni Guo nu daytoy ket agsubli iti pagilian a China gapu ta iti laksid ti panangidedikarda iti biyagda iti China’s Ministry of State Security ket sabali ti nagbannaganda.
Gapu iti dayta, kiddawna kenni Guo nga ibagana ti kinapudno nu sanna a kayat a maitulad kenkuana.
Maibasar iti documentary a naipablaak iti sabali a media source iti ballasiw taaw, maibagbaga a ni Guo ket naiyanak idiay Fujian, China ken daytoy ket anak ni Lin Wenyi.
Nu pay kasta, pinaglibakan ni Guo a saanna nga am-ammo ni She Zhijiang bayat a kiniddawna ti panakaalana iti kanayunan a detalye maipapan iti documentary para iti panangipilana iti reklamo kontra iti daytoy.
Nu pay kasta, impeksa ni Almario a saanna a mabalin a pilaan iti kaso ni Zhijiang gapu ta nakabaluden daytoy sadiay Thailand.
Inyunay-unay met ni Guo a saan daytoy nga spy ti China agsipud ta ay-ayatenna ti pagilian a Pilipinas.
