BAGUIO CITY – Manarimaanen ti panakaisimpa ti sigud a dumpsite sadiay Irisan Barangay ditoy siudad ti Baguio tapnu mapagbalin nga ecological park.
Sigun kenni City Engineer Edgar Victorio Olpindo, dumanonen iti 60.22 percent ti nakompleto iti umuna a phase ti proyekto.
Saksakupen ti phase 1 ti proyekto ti panakaimula ti bermuda grass ken sabsabong, konstruksion ti walkways ken panakaibangon dagiti bamboo nipa huts.
Sakupen pay ti phase 1 ti proyekto ti konstruksion ti softscapes wenno ti greenery ken flower gardens, slope protection babaen ti panagmula ti vetiver grass, dap-ays, methane gas exhaust holes, vertical garden ken ti geo-textile surface treatment.
Puntirya a makompleto ti proyekto inton December 26 ti agdama a tawen ken aggatad daytoy iti P17.2-M no sadino, nagtaud ti pondo iti 2011 ken 2014 Local Development Fund.
Sakupen met ti phase 2 ti proyekto ti solar powered system para iti walkways, nursery, cactus garden, kanayonan a dap-ays, comfort rooms, galleries ken dadduma a gardens nga addaan ti mapattapatta a gatad a P25-M.
Makikokoordinar metten ti City Engineering Office kadagiti maseknan nga opisina iti lokal a gobyerno ti Baguio tapnu makaalada ti kanayonan nga ideya ken rekomendasyon iti ad-adda pay a panakapasayaat ti parke.
Maipalagip a ti proyekto ket maitunos iti kari ti siudad iti National Solid Waste Commission.
