Impakaammo ti Department of Justice babaen kenni Secretary Fredderick Vida a kinumpirmar ti Czech Republic Authorities nga awan iti nasao a pagilian ni former Ako Bicol Party-list Rep. Zaldy Co.
Sigun kenkuana, apaman a nakisarita daytoy kadagiti nagduduma nga opisyales ken otoridad idiay Czech Republic, impakaammoda kenkuana nga awanen iti kustodiyada ti sigud a mammanday-linteg.
Innayonna nga apaman a naamwanna ti nasao a damag, dagos dagitoy a nakikoordinar kadagiti international authorities.
Iti baet dayta, agtaltalinaed a kumpiyansa ti nasao nga opisyal a maiyawid ni Zaldy Co iti pagilian a Pilipinas.
Daytoy ket gapu ta kanselado ti passportna kas kinumpirmar ti Department of Foreign Affairs ken Korte Suprema, kayatna a sawen, saan a nalaka nga agalis ni Zaldy Co iti lokasyon gapu iti kanselado a passportna.
Innayon pay daytoy a ti laeng makumpirmarda nga impormasyon iti agdama seknan iti ayan ni Zaldy Co ket sigurado nga adda daytoy iti uneg ti Schengen Area.
Ti Schengen Area ket maysa kadagiti kadadakelan a border-free zone iti lubong no sadino mabalin nga umuneg iti nagbaetan ti 29 a pagilian a saan a kasapulan ti internal border check. //bombokaren.c.s
