--Ads--
BAGUIO CITY – Maipasungalngal ti tallo a fighters ti Team Lakay iti event card ti ONE Championship a maangay inton October 30 sadiay Singapore kalpasan ti agarup innem a bulan a lay-off gapu iti agdama a pandemya.
Sigun kenni Chatri Sityodtong, founder ken CEO ti nasao a mix martial arts promotion, karaman kadagiti tallo ni sigud a ONE Lightweight World Champion Eduard Folayang.
Kinunana a makasango ni Folayang ni Antonio Caruso ti Australia iti maysa kadagiti main event.
Maipalagip a naabak ni Folayang iti naudi a labanna idi Enero kontra kenni Peter Buist.
Sigun met keni Team Lakay head coach Mark Sangiao, maiwaragawag to dagiti dua pay a lumaban inton tapos kadagiti masungad nga aldaw nupay agtultuloy ti nainget a panagsanay dagitoy.
