Impeksa ni sigud a Senador Antonio Trillanes IV a saan a posible nga agsubli iti Pilipinas ni sigud a Presidente Rodrigo Roa Duterte manipud The Hague, Netherlands.
Sigun iti sigud a senador, posible a saanen a maiyawid ni Duterte nga agdama a naibalud iti detention facility ti International Criminal Court.
Inlawlawag met ni sigud a Senador Trillanes a daytoy ket gaputa saanen a kameng ti Pilipinas iti International Tribunal.
Kayatna a sawen, saan a nalawag ken mabalin ken saan a mabalin nga iturong ti kostodiya iti Pilipinas para iti sigud a Presidente iti kanito a maipaay wenno mapatgan ti kiddaw daytoy nga Interim Release. Nupay kasta, imbinglay ti sigud a senador a ti makitkita a wagas tapno maisubli ti sigud a Presidente iti Pilipinas ket nu maibasura ti kaso a sangsangwenna iti International Criminal Court.
“Malabo na po… Dahil hindi na po tayo miyembro ng ICC ay hindi talaga wala na tayong boses dun at hindi na rin pwede tayong ang mag-host ng kay Duterte kung sakaling mabigyan man siya ng Interim Release kasi hindi na nga tayo miyembro.”
“Malabo na talagang makauwi siya unless ma-didismiss yung kaso. Kaso dine-delay nga nung mga kampo nila yung pagsimula nung trial. So yun po ang magiging dilemma nila.”
Former Senator Antonio Trillanes IV
Maipalagip a nakemmeg ken naiturong ni sigud a President Rodrigo Duterte paturong iti International Criminal Court – The Hague, Netherlands.
Sangsangwenna ti kaso a crimes against humanity seknan iti pannakaimplementar ti war on drugs iti administrasionna.
Innayon pay ni Trillanes IV a ti panangipaay ti ‘interim release’ ket saan a nalawag gaputa awan ti kapada a kaso ni Duterte ti naipaayan iti kiddaw a temporario a wayawaya.
Kabayatanna, iti benneg met dagiti Duterte, patien ti abogado a ni Atty. Mark Tolentino nga adda pay ti namnama a maisubli daytoy iti Pilipinas.
Sigun kenkuana, adda pay ti wagas a mabalin a maaramid tapno posible a maiyawid ti sigud a Presidente manipod iti pagbaludan.
Ngem aklonenna nga International Criminal Court laeng ti adda iti posisyon a mangibaga ti desision seknan iti kaso ni Duterte.
