Impaganetget ni sigud a presidential spokesperson Harry Roque a ti panggep ti Department of Justice (DOJ) a mangkanselar iti pasaportena ket “politically-motivated.”
Immuna nga imbutaktak ni Justice Secretary Jesus Crispin Remulla nga inrugi ti DOJ ti pannakakanselar ti pasaporte ni Roque.
Ti sigud a presidential spokesperson ket adda ita iti The Hague, the Netherlands, sipud idi tiniliw ti International Criminal Court ni sigud a President Rodrigo Duterte.
Imbilin ti maysa a regional trial court idiay Angeles, Pampanga ti pannakatiliw ni Roque gapu iti qualified human trafficking, kaduana ni Cassandra Ong ken dadduma pay nga indibidual a karaman iti Philippine Offshore Gaming Operator (POGO) hub Lucky South 99.
Sigun kenni Roque, ti pannakakanselar ti pasaportena ket “premature” gapu iti motion for reconsideration nga impilana idi napalabas a lawas, a kiniddawna iti Department of Justice a madismisar ti kasona.
Maipalagip a naduktalan ti signature ni Roque iti sumagmamano a dukumento ti Lucky South 99 ken nakipagtrabaho pay iti kaduana nga akusado nga Ong para kadagiti ligal a banag ti POGO hub.
