Impetteng ni sigud a Senate President Franklin Drilon a mabalin nga adda pakainaiganna iti umadanin nga impeachment trial ni Vice President Sara Duterte ti agtultuloy a panaglangan dagiti senador manipod iti mayorya kadagiti sesion iti Senado.
Sigun kenni Drilon, posible a likliklikan iti majority bloc ti panangipatungpal iti session tapno saan a maaddaan iti reorganization iti liderato iti Senado, a mabalin a makaapektara iti panagdengngeg iti impeachment trial a naituding a mangrugi inton Hulio 6.
Kinunana a nu awan ti sesion ken dagos nga ag-adjourn ti Senado, agtalinaed ti agdama a liderato nga idadauloan ni Alan Peter Cayetano iti panangidaulo iti panagdengngeg.
Kinuna ni Drilon a ti singasing a panagbalbaliw iti attendance rules ket mabalin a panggepna a mapagtalinaed ti 13 a kameng iti mayorya babaen iti absentee voting, karaman dagiti senador nga adda iti dadduma a pagilian wenno adda iti kustodia.
Kabayatanna, impaganetget ni Drilon a panaglabsing iti Konstitusion ti kiddaw ni Duterte nga ibasura ti impeachment case kontra kenkuana, gaputa mapapati nga awan ti pannakabalin ti Senate impeachment court nga aramiden daytoy.
Kinunana a mabalin a kuwestunaran iti Korte Suprema ti aniaman nga addang iti mayorya a mangikkat iti bileg iti kaso.
Itay laeng nabiit, nangipila ni Duterte iti pormal a sungbat iti Articles of Impeachment ken kiniddaw a maibasura ti reklamo kontra kenkuana.
