BAGUIO CITY–Nakabalud ita iti Baguio City Jail ti pugante a sigud a hepe ti pulisya a suspek metlaeng iti maysa a kaso ti pammapatay ditoy siudad ti Baguio idi 2014.
Nabigbig daytoy a ni PCI Diosdado Mirador Mejala, sigud a hepe ti Tubao PNP sadiay La Union.
Nakemmeg daytoy sadiay Camp Crame, Quezon City babaen iti bileg ti warrant of arrest nga impaulog ni Regional Trial Court, Branch 5, Baguio City Presiding Judge Maria Ligaya Itliong-Rivera nga awanan ti piyansa.
Naamuan a ni Mejala ti No. 5 Top Most Wanted Person ti rehion Cordillera ken daytoy pay ti suspek iti panakapapatay daydi Frank Joselito Dacanay Lopez idi June 17, 2014.
Maipalagip a nasarakan laengen sadiay Suello Village, Baguio City ti naibelleng a bangkay ni Lopez ken naamuan a sakbay ti insidente ket nainget a binabalaw ti biktima ti panag-adu dagiti ngilaw kadagiti poultry farms sadiay Tubao ken kiniddawna ti aksion ti mayor sadiay a ni Dante Garcia.
Naibasura ti kaso a naipila kontra kenni Mejala gapu iti kinakurang ti ebidensia ngem naipila manen ti kaso kalpasan ti naun-uneg nga imbestigasyon a nangitunda iti panakaipaulog ti warrant of arrest kontra iti daytoy idi July 2015.
