BAGUIO CITY – Naangay ti arraignment iti kaso a sangsangwen ni sigud a Baguio City Congressman Nicasio Aliping ken ti tallo a kontraktor a kadwa daytoy iti Regional Trial Court (RTC) – Branch 10 sadiay La Trinidad, Benguet.
Sumangsango dagiti uppat iti kaso a panaglabsing iti Presidential Decree 705 wenno ti Revised Forestry Code of the Philippines gapu iti panangdadaelda kadagiti adu a kayo iti forest reserve ti Mt. Sto. Tomas sadiay Tuba, Benguet para laeng iti road project a paturong iti sanikua ti pamilya Aliping.
Naamuan a nag-plead a ‘not guilty’ ni Aliping ken dagiti kontraktor a da William Go, Bernard Capuyan ken Romeo Aquino.
Immunan a nagpiyansa ni Aliping iti P200,000 para iti kaso a sangsanguen daytoy kasaruno ti panakaiyetnag warrant of arrest daytoy.
Naituding met a maaddaan iti preliminary conference inton January 8, 2018 ti kaso dagiti uppat a personalidad iti met laeng RTC – Branch 10.
Sigun kenni Atty. Larry Gacayan, legal counsel dagiti nasao a personalidad, maiparanag met laeng iti nasao nga aldaw dagiti ebidensya ken dagiti testigo iti nasao a kaso iti para iti pre-trial dagitoy.
[note: ti arraignment ket ti pormal a panakaibasa ti dokumento a nakailanadan ti kaso iti mismo a presensia ti defendant wenno ti makaskasuan tapnu maimpormaran daytoy iti kaso a sangsangwenna. kas sungbat ti respondent, manamnama a mangiserrek daytoy iti plea – mabalin a ‘guilty’ wenno ‘not guilty’]
