BAGUIO CITY – Napaay ti Igorot boxer a ni Dayer Gabutan a manggun-od iti bakante a titulo ti World Boxing Council (WBC) – Asian Boxing Council Silver Super Flyweight Champion iti labanda kenni undefeated 115-pounder ZongLi He ti China.
Nangabak ni ZongLi He babaen iti unanimous decision kalpasan ti 10 a rikos ti labanda kenni Gabutan iti Olympic Park sadiay Xi An, China.
Kabayatan ti umuna a rikos ti laban ket nagsagrap ti sigud a six time WBO Oriental Bantamweight Champion ti sugat iti kanawan a kiday daytoy kalpasan ti panag-head butt dagitoy.
Nupay kasta, nabaelan latta ni Gabutan a na-knockdown iti namin dua a daras ti kalabanna ngem saan a binilangan ti referee ni ZongLi.
Nagbalin met a parikut iti vision ti Igorot boxer ti nasagrapna a dunor kabayatan ti 10 a rikos ti laban daytoy.
Iti FB account ni Gabutan, nagyaman daytoy kadagiti amin a nangikararag ken nangsuportar kenkuana ken nagkiddaw ti pammakawan kadagiti amin a nangnamnama iti panangabakna.
Impasiguradona met ti ad-adda a panagsanay ken panagkararagna para kadagiti sumaruno a labanna.
Inaklonna pay a saan daytoy a maiparbeng iti 115 lbs division ngem inkarina a saan a daytoy ti gibus ti amin.
Patien met ni renowned Igorot boxing promoter Brico Santig a naikawa ni Gabutan idi limmaban daytoy iti super flyweight nangruna ta kadawyan nga iti upper weight classes daytoy a lumablaban.
Naamuan nga iti official weigh-in ket nagun-od ni Gabutan ti 114¾, ti kababaan a timbang a nailistana iti uneg ti 10 a tawen.
Iti agdama, nakailista ti 29-year-old Highland Boxing Gym fighter iti rekord a 20-7-3, 11 KOs bayat a ni ZongLi ket nakailista iti rekord a 4-0, 1 KO.
Naamuan pay a ni ZongLi ket nagsanay iti sidong ni Igorot boxing coach Roldan Bullong ti Benguet, maysa kadagiti trainers ti MP-Highland Boxing.
