Ad-adalen iti Baguio City Council ti singasing a limitaran ti kinaadu iti liquor outlets iti maymaysa a lugar tapno makessayan ti posible a gulo ken pakaseknan iti peace and order.
Iti sidong iti singasing a Codified Liquor Ordinance, maipawil ti dua nga establisimiento nga addaan iti “on-site drinking” nga aginasideg iti uneg iti 20 a metro.
Maituding metlaeng ti bilang iti outlets maibasar iti populasion—1 iti tunggal 6,000 a residente para kadagiti pagilakuan a mangilaklako iti arak, ken 1 iti tunggal 3,000 a residente para iti bars, lounges, ken dadduma pay a kapada nga establisimiento.
Sigun kenni Baguio City Councilor Paolo Raynor Salvosa, para laeng daytoy kadagiti baro nga aplikante ken saan a maapektaran dagiti agdama a ligal a negosio. Dumalan pay daytoy iti nainget a ligal a panagsukimat ken public consultations.
Karaman metlaeng iti singasing ti naing-inget a zoning rules, distansya manipod kadagiti pagadalan, simbaan ken ospital, limitado nga oras iti operasion, ken obligado a training ken permit para kadagiti mangilaklako ken mangidiadiaya iti arak.
Nu kaspangarigan naglabsing, mabalin a maikkat ti business permit iti establisimiento.
Iti agdama, agtultuloy paylaeng a maad-adal ti singasing bayat a maur-uray ti komento iti City Legal Office ken dadduma pay nga stakeholder.
