BAGUIO CITY – Tubtubngaren ni Baguio City Mayor Mauiricio Domogan ti singasing a nasapsapa a panaglukat ti night market sadiay Harrison Road.
Kinunana a mangitunda laeng iti nailet a gunay iti trapiko ti nasao a singasing nangruna ta maysa ti Harrison Road kadagiti kanayun a pakapaspasamakan iti traffic congestion.
Nupay kasta, kinunana a mabalin a mailaylayon ti operasion dagitoy agingga iti agsapa manipod iti agdama nga alas nuebe iti rabii agingga iti ala una ti parbangun.
Impalagipna nga immunan nga adda ti panggep a panakaiyakar ti night market iti igid ti Melvin Jones sadiay Burnham Park.
Kinuna pay ti mayor nga iti kanito nga maaprobaran ti plano ket agbalin daytoy a permanente a lugar para iti operasyon ti night market a nataltalged kadagiti kostumers.
