Impakaammo ni Baguio City Mayor Benjamin Magalong a manamnama a maaddaan ti shuttle services dagiti pasaheros nga agturong iti city proper apaman a malpas ti Baguio Integrated Terminal Project idiay Marcos Highway,Barangay Dontogan, Baguio City.
Nupay kasta, inlawlawag ni Mayor Magalong a saan daytoy a libre.
Iti laeng February 18, 2026, naipatungpal ti site inspection iti pakaibangunan ti nasao a terminal nga indauloan ni Mayor Magalong kadwa dagiti kameng iti Megawide Construction Corporation, City Building and Achitecture Office(CBAO), City Engineering Office(CEO) ken ti General Services Office(GSO).
Ti Baguio Integrated Terminal Project ket naituding a marugyan iti maikadua a kwarter iti agdama a tawen nu sadino, inlawlawag ti nadakamat a kompanya a malpas amin dagiti dokumento a kasapulan para iti daytoy iti las-ud ti innem a bulan.
Maaramid daytoy iti sidong ti 40 a tawen a kontrata iti Private-Public Partnership (PPP).
Panggep ti nasao a proyekto a pasayaaten ti sistema iti transportasyon iti siudad ti Baguio ken tapno mapalag-an ti nailet a gunay ti trapiko.
Kabayatanna, kagiddan ti site inspection ket naangay metlaeng ti index inflation agreement.
Mainaig iti dayta,immunan a naibinglay ti kapitan iti Barangay Dontogan a ni Mr. Renato Bongcog Sr. nga agsagsaganan ti masakupanna a barangay para iti posible a trapiko a mapasaran sadiay apaman a marugyan ti konstruksyon iti nasao a proyekto.//Bombo Noveh Organo
