BAGUIO CITY – Agtultuloy ti panangwaknit dagiti otoridad ken dagiti personnel ti nagduduma a district offices ti DPWH-Cordillera kadagiti kalkalsada iti rehion Cordillera a naapektaran iti panagdalapos ti bagyo nga Ulysses.
Maibasar iti kaudian a report ti DPWH-Cordillera, iti alas dose ti pangaldaw idi kalman, November 13 ket 38 a road sections iti nagduduma a kalsada ti rehion ti one-lane passable bayat a dumanon met iti 38 a road sections ti nakarikep.
Nailista met ti walo nga insidente ti panaglayos ken 64 nga insidente ti panagreggaay, pakairamanan ti maysa a dakkel a panareggaay ti daga.
Inreport met ti DepEd nga innem a pagadalan iti rehion ti nakapasar ti dadael iti imprastraktura, sag-lima a pagadalan ti naapektaran ti panaglayos ken panagreggaay ti daga ken maysa a pagadalan ti apektado gapu iti nadadael nga access road.
Agtultuloy met ti panagawat ti Department of Agriculture iti report manipud kadagiti municipal agriculture offices iti rehion tapnu maamuan ti epekto ti bagyo nga Ulysses iti sektor ti agrikultura.
Maibasar iti kaudian a report ti ahensia, nasuroken iti P73.5-M ti dadael nga intunda ti nasao a bagyo iti sektor ti agrikultura.
