BAGUIO CITY – Saan pay laeng a marikna dagiti sumagmamano nga OFWs sadiay Qatar ti epekto ti mapaspasaran a diplomatic crisis sadiay.
Iti panakipatang ti Bombo Radyo kenni Fredrome Palaci Nuez manipud Baguio City ken mangmangged sadiay Alkhor, Qatar, kinunana a saanda pay a marikna ti epekto ti nasao a krisis iti importasyon dagiti taraon sadiay.
Nupay kasta, kinunana a sigurado a maaddaan iti kurang a suplay ti taraon kasaruno ti panangputed dagiti dadduma a pagilian iti koneksyonda iti Qatar.
Kinunana met nga awan pay ti advisory nga impaulog ti pagpapaayanda a kompanya nga addaan iti agaraup pitopulo ket lima a porsiento a Pilipino nga empleado.
Kabayatanna, kinuna ti maysa a receptionist sadiay Doha, Qatar a manipud ditoy siudad ti Baguio ngem nagkedked nga agpadakamat iti nagan, a manamnama a ngumato ti presyo dagiti kangrunaan a gagatangen sadiay.
Kinunana a manamnama a ngumato ti presyo ti manok a kangrunaan a maang-angkat manipud Saudi Arabia, ken sumaruno a ngumina dagiti dadduma a produkto.
Innayunna nga iti kanito a kumaro ti sitwasyon sadiay ket mapilitan daytoy nga agawid ditoy pagilian a kas iti panggep dagiti kakadwana a Pinoy sadiay.
Immunan a kinuna ti maysa a Pinay OFW sadiay nga adda ti agwarwaras nga impormasyon sadiay a nainget a bantayan ti gobyerno ti Qatar ti komunikasyon sadiay agramanen iti social media.
