Nakasaganan ti siudad ti Baguio para iti manamnama a panakaipatungpal ti sumaruno a maika-pito a Fishing tournament sadiay Burnham Lake, Baguio City inton Independence day wenno inton Hunyo a dose iti agdama a tawen.
Iti panakiuman ti Bombo Radyo kenni Rafael Serrano, Coordinator ti Burnham Lake Fishing Tournament, impakaamona a para iti sumaruno a torneo ket adda ti mainayun a pagannurotan dagitoy no sadino maipaayan dagiti makipaset ti tallo oras nga agkalap bayat a mabalin met dagitoy nga agusar ti bangka ken rumbeng ti panakaadda ti bukod nga equipments.
Sigun kenni Serrano, sisusuporta dagiti opisyales ti Baguio para iti daytoy nga aktibidad kasta a tumultulong met ti City Environment and Parks Management Office para iti usaren dagitoy a kagawaan.
Kinuna ni Serrano nga ado ti main-interesado a makipaset iti daytoy a torneo agsipud ta siasinu ti makaibaga nga iti banbantay nga itsura daytoy ket adda gayam ti Burnham Lake a mabalin a pagkalapan.
Itay napalabas, saan laeng a dagiti residente ti siudad ti Baguio ti nakipaset iti daytoy no di ket pati dagiti sabali a luglugar a pakairamanan ti Bulacan, Pampanga, Abra ken daduma pay.
Impakaamo met ni Serrano nga iti las-od ti dua a tawen a maipatpatungpal ti fishing tournament ket ti kaatidogan a lames a nailistada ket ti tilapia nga addaan rukod a 26 inches.
Kabayatanna, maal-allukoy ti publiko, saan laeng nga iti rehiyon Cordillera no di ket ti intero a pagilian a makipaset iti daytoy nangruna ket nangrugin ti registration ita nga aldaw agingga inton maipatungpal ti nasao a torneo.//M
