Pormal a napili ti siudad ti Baguio kas National Finalist iti WWF One Planet City Challenge (OPCC) 2025–2026 cycle.
Daytoy ket pammaneknek iti agtultuloy a panangidaulo iti siudad seknan iti urban climate action.
Sigun kenni City Planning, Development and Sustainability Office (CPDSO) Head Donna Rillera Tabangin, daytoy ti maikadua a gundaway a nagbalin a finalist ti siudad iti pasalip a daytoy, a nakailista iti kadakkelan a global participation iti pakasaritaan nga addaan iti agarup 380 a siudad manipod iti 51 a pagilian.
Iti Pilipinas, ti siudad ti Baguio laeng ti napili iti 28 a nakipaset a siudad—ti kangatwan a local turnour manipod idi 2015—a nangipakita iti agtultuloy a dedikasion iti siudad iti transparent reporting ken dagiti addang para iti sustainability.
Kas National Finalist, kwalipikado ti Baguio a makipaset iti “We Love Cities” global campaign, a mangipaay iti dalan iti direkta a pannakipaset dagiti umili tapno mangisingasing kadagiti addang ken panangpasayaat para iti siudad.
Ti pannakipartisipar iti Baguio iti OPCC ket indauloan iti CPDSO ken SIGLAT – Baguio Youth Innovation Hub.
Sigun iti World Wide Fund for Nature (WWF), panggep iti One Planet City Challenge nga ipakita dagiti kongkreto a tignay dagiti siudad iti climate mitigation ken adaptation, ken tulungan dagitoy a mangipatungpal kadagiti programa a mangpasayaat iti balanse a koordinasyon iti tao ken ti aglawlaw iti uneg iti limitado a lubong.
