BAGUIO CITY- Naitaray iti ospital ti siyam nga indibidual kalpasan a natnag ti nagluganan da nga strada vehicle iti rangkis sadiay Ileb, Nambaran, Tabuk City, Kalinga itay malem.
Nabigbig dagitoy a da Jayvee David Mangada, 22, driver; Santos Macasaddog, senior citizen; Analiza Macasaddog, 30, BHW; Theresita Casibang, senior, Lupong Tagapamayapa; Mayla Tagacay, BNS; Monaliza Ramilloza, 30, BHW; Xymon Macasaddog, 9-months, Rica May Macasaddog, 23, ken Biado Pablito, senior.
Kaadoan kadagiti biktima ket Barangay Officials ti Barangay San Francisco, Rizal, Kalinga.
Iti inisyal nga imbestigasyon dagiti otoridad, nagtaud dagiti biktima iti gathering manipud Iloba Resort ken paawid dagitoy.
Nupay kasta, kabayatan ti panagdalyasat da iti kalsada, adda ti natnag a bato a nangitunda iti panag-panic ti driver.
Gapu iti daytoy, natnag ti lugan iti rangkis a nangitunda iti panakadangran dagiti biktima.
Rinespodean met daytoy dagiti personnel ti PDRRMO, BFP, AFP, PNP ken MDRRMO.
Iti interview ti Bombo Radyo Baguio, kinuna ni Peobilyn Bumanglag ti PDRRMC-Kalinga, adda metlaeng ti nailista nga aksidente iti nasao a lugar ngem iti sabali a rason.
Dinakamatna a kaadoan kadagiti nailista nga aksidente sadiay Kalinga ket napukawan iti kontrol ti driver.
Iti agdama ket al-alaen paylaeng ti Bombo News Team ti kanayonan a detalye seknan iti agdama a kasasaad dagiti biktima.
