BAGUIO CITY – Inaklon ti Department of Foreign Affairs (DFA) – Baguio a limitado ita dagiti mabalin a ma-akomodar iti online appointment para iti panagala iti pasaporte.
Iti panakiyuman ti Bombo Radyo kenni Eleanor Belgica, Officer-in-Charge ti DFA-Baguio, kinunana a limitado laeng dagiti ma-akomodar nga aplikante gaputa masapul nga agannad ti ahensia tapno maipanamnama a saanda nga agbiddut kadagiti proseso nangruna ta nangrugin ti 10-year validity ti Philippine passport.
Kinunana a saan a kabaelan ti DFA-Baguio nga akomodaren dagiti amin nga agtartarigagay nga agpa-book iti online appointment gapu iti kinakurang dagiti empleyado dagitoy a mangiproseso kadagiti passport applications.
Inallukoyna met ti publiko iti panakigiddanda iti online system ti DFA gaputa daytoy ket international standard operation.
Inaklonna pay a makaaw-awat dagitoy iti adu a reklamo gapu iti kinarigat ti panagala iti pasaporte kalpasan a napunno ti slot iti online appointment ti opisinada agingga inton Marso.
Kabayatanna, balbalakadan ni Belgica ti publiko iti saan dagitoy a panagpa-allukoy kadagiti fixers a mangididiaya iti naparpartak a panakaiproseso dagiti passport application dagitoy.
Innayonna a mabalin nga agturong dagiti passport applicants kadagiti uppat a travel agencies nga accredited ti DFA-Baguio para iti panagala dagitoy iti pasaporte.
